Bakı şəhər Gənclər və İdman Baş İdarəsinin dəstəyi ilə keçirilən və 1 aydan artıq müddət ərzində dairəvi sistem üzrə baş tutan çempionat “Qarabağ” RK və “TİSA Titans” komandalarının final oyunu ilə başa çatdı. Nəticədə gərgin mübarizədə daha təcrübəli rəqibinə 70:45 hesabı ilə qalib gələn “Qarabağ” reqbiçiləri birinci Bakı çempionatının qalibi oldular. Yarış iştirakçılarına medallar və xatirə diplomları təqdim olundu. “Qarabağ” RK-nın rəhbəri Eldar Kərimov oyunun sonunda təəssüratlarını bölüşdü: “TİSA komandasının daha təcrübəli olmasına və məşq üçün ideal şəraitinin olmasına baxmayaraq, komandamız bu gün çempion olmaq arzusunun həddindən artıq çox olmasının hesabına qalib gəldi. Çempionatda komandamızın oyununa diqqət yetirərkən biz o nəticəyə gəldik ki bir çox oyun komponentləri üzərində çoxlu çalışmaq lazımdır. Bircə şəraitimiz olsaydı… Həftədə bir-iki dəfə məşq etməklə yüksək nəticələr göstərmək çox çətindi və buna görə bu gün qazandığımız qələbə bizi çox sevindirir. KİV nümayəndələrinə reqbiyə göstərdikləri diqqətə görə təşəkkürümü bildirirəm. Müasir reqbi Azərbaycanda 2004-cü ildən mövcuddur, lakin bu idman növünün bu illər ərzində mövcud olmasına görə biz iki nəfərə borcluyuq: klubumuzun baş məşqçisi Vaqif Səadətxana, hansı ki uzun illərdir ki böyük həvəslə gənc reqbiçiləri yetişdirir və “İnter” PİK-in prezidenti cənab Georgiy Nikolova. Cənab Nikolovun reqbiyə biganə qalmaması və onun tapşırığı ilə İnter-Arena stadionunun məşq meydançalarından birinin reqbiçilərin təmənnasız istifadəsinə verilməsi oyunçularımızı məşqsiz qalmasından xilas etdi. Bu gün biz ölkədə ilk peşəkar uşaq reqbi klubunu yaratmışıq və bu uğur reqbinin Azərbaycanda yeni Olimpiya idman növü kimi inkaşafında dönüş nöqtəsi olacaq”.

LİNK